Follow @nawaf

زواج ١٠١

طلب مني صديقي العزيز أحمد في التدوينة السابقة اني اكتب عن الزواج بحكم تجربتي .. وما أدري ليش كل ما اتكلم معاه يفتح نفس الموضوع !

فقررت اني ألبي مطالب الشعب الكريم واكتب مجموعة نصائح على شكل سلسلة من التدوينات .. اكتب في كل تدوينة نصيحة وحده ونتناقش فيها بتفصيل أكبر

طيب .. في البداية أنا تجربتي في الزواج عمرها ٣ سنوات تقريباً .. سنتين زواج + سنة خطوبة .. ماهي فترة طويلة لكن مريت فيها بعدة مراحل .. مرحلة الخطوبة والرومانسية والبكش .. مرحلة ما قبل الأطفال .. ثم مرحلة ما بعد الأطفال !

كان نفسي أضيف مرحلة ما قبل البلاك بيري !! .. بس هذي لها موضوع ثاني .. المهم انو كل مرحلة كانت مختلفة عن الثانية .. والأهم من هذا كله أن الواحد لازم انه يعرف في يوم من الأيام (ان شاء الله) راح يمر بهذي المراحل وانه لازم يتقبل التغيير الكبير اللي راح يحصل في حياته ويتكيف معاه

خلينا نبدأ بمرحلة الخطوبة .. وأول نصائحي للعرسان وحتى العزاب المطفرين! :

١- أول نصيحة وأغرب نصيحة .. أنك ما تسمع نصيحة من أحد ! .. كيف ؟

قبل الزواج عادة ما يتملك الفضول الشاب أو الشابة لمعرفة هذا الشئ الغريب المسمى بالزواج ! .. فتجده لا يترك أحد متزوج إلا سأله حتى حارس العمارة !!

ولو دققت في نصائحهم .. ستجدها تختلف من شخص لآخر .. طبعا إذا كان هؤلاء الأشخاص من بيئات مختلفة وليسوا من نفس العائلة حيث جميع الافكار مكررة وهيّا نفسها !

وأيضاً لا تحاول مثلي شراء كل كتب جرير التي تتحدث عن الزواج .. واللي يتكلم فيها كاتب اجنبي عن تجربته وعلى بالك انك راح تستفيد منها ! .. كلام فاضي مع احترامي !

من هذا كله نستنتج انو النصائح مختلفة دليل على انو التجارب مختلفة .. يعني بالله عليك كيف تعطيك نفسك انت تقبل نصيحة مدمرة مثل: “الحرمه ما تمشي الا بالعين الحمرا” .. وتروح سيدا تطبقها على زوجتك بس عشان صاحبك او قريبك او حتى ابوك قالك الشي هذا !

أنا ما اقول لا تسمع لأحد .. اسمع بس حكّم عقلك .. واختار الشي الطيب واترك السيئ

الزواج ماله ستاندرد معين (مقياس) .. الزواج هو دمج لحياة شخصين (بجميع افكارهم ومعتقداتهم وطموحاتهم) .. لتخرج في كل مرة .. تجربة مختلفة تماماً

إذا كنت لديك الشغف لمعرفة كيف تفكر المرأة أو إذا كان لديكي الشغف لمعرفة كيف يفكر الرجل .. لا تسألي أحد لأنها راح تجاوبك كيف تفكر هيا وليس زوجك أو زوجتك !؟

خلاصة القول يا جماعة :

انو لكل شخص طريقة تفكير مختلفة .. حاول ان تعرفها .. وبناءاً عليها تعامل معه على أساسها .. وسلامتكم

 

  1. alahmady - 28/3/2011 @ 10:31 مساءً

    يانواف كلامك ماعليه غبار ,, بس انت تتكلم عن شي اسمو تكملة عمر وعشرة على الحلوة والمره ,, تجربة حتسير قدام الواحد فينا مي سهله ,, من البديهي انو الواحد يسأل هنا وهناك ,, لكن اعتقد ان الأصح هو اخذ الطيب من النصايح وتطنيش البطال ,, يعني لمن يقللي ابوية لاتوقف فوجه حرمتك على كل صغيرة وكبيرة وحاول تسلك الأمور ,, هنا المفروض احطها حلقه ف اذني ,, وهكذا دواليك ,, شكرآ لك ^,^

    • نواف - 29/3/2011 @ 3:36 مساءً

      تمام انا معاك .. لازم الواحد يسأل ويستفيد من الخبرات
      لكن من كل شي ناخذه انه من مسلمات الحياة
      مو كل الرجال متشابهين ولا الحريم نفس الشي
      عشان كذا انا كان قصدي لازم تعرف ايش طباع الطرف الاخر وتتعامل معاه على اساسها

  2. مطهمج - 28/3/2011 @ 11:38 مساءً

    بأدلوا بدلوي المليئ بالتجارب خصوصا في هذا الشق التعيس من الحياه
    للمقبلين على الزواج .. لا تحاول تفهم شريك حياتك ..
    لانك بعد فتره راح تكتشف انك ضيعت حياتك و لسى ما فهمت
    اكتفي بهذا القدر .. و الله الموفق

    • مطهمج - 28/3/2011 @ 11:40 مساءً

      و على خويك احمد ..
      يا اخي زوجووه .. الادمي من اول بيلمح
      الله ييسر له امره … و يزوجه ببنت الحلال اللي ما تطلع عينه

    • نواف - 29/3/2011 @ 3:38 مساءً

      انت باين انو كانت لك تجربة سيئة في الماضي عشان كذا حكمت على اساسها انو الزواج فكرة سيئة !
      حاول تنسى وتبدأ صفحة جديدة

  3. Dr_mjood - 29/3/2011 @ 1:30 صباحًا

    100% agree with you
    كل واحد تلقاه ينصحك ويحذرك من حاجات صارتله ومو شرط تصير مع كل الناس!
    Good start with this subject .. Go ahead :)

  4. Tuta Nawato - 29/3/2011 @ 7:13 صباحًا

    اجل ونعم..كلامك تمام التمام..
    بنات حصلت معاهم حالات الطلاق عشان حضرته مايعرف يتصرف مع البنات وقرأ كم كتاب من جرير عن صفات المرأة، وللا عشان صاحبه قاله له : ” لاتخللي حرمتك تتأمر عليك ولا تسمعلها اي طلب”.. سلامات ياعمي؟ متزوج جهاز مثلاً؟
    اشكرك على الموضوع الجذاب..كلي عيون قارئة لبقية خبراتك في هذه الحياة..استمر.. 

    • نواف - 29/3/2011 @ 3:43 مساءً

      في بعض الناس اخذين الزواج قتال .. اهم شي كلمته ما تنزل .. وهيا اهم شي كلمتها !!
      وهاتك يا مضاربات وصريخ .. وايش الفايدة غير تعب النفس ووجع الراس

  5. حآلم - 29/3/2011 @ 2:19 مساءً

    أهلاً أهلاً <~ مكسوف هههههههه

    يا خي شاغل بالي الموضوع وقلت أسأل فيه أهل الخبرة .. قيدك إنت عارف البير وغطاه (:
    وبالمرة الكل يستفيد يعني |:

    تقريباً أكثر أسئلتي تتمحور حول نقتطين .. إختيار الزوجة ..
    وحده قريبة ، من الجماعة؟ أو بعيدة ، أكون ما أعرف عنها ولا عن أهلها شيء ! وهذا أقرب شيء لنفسي .. أحس الزواج تطول فترة الإكتشافات فيه – وبالتالي المتعة – لما أتزوج وحده لا أنا ولا أهلي يعرفوا عنهم شيء .. أقصد ماضيهم ! لكن أكيد قبل الزواج بفترة أحللها مزبوط عشان أشوف تناسب أولا ..
    لإني خلاص مليت من النموذج المتكرر .. بنت خالتك أو عمتك تكون عارف عنها 90% تقريباً ، وأحسه خلاص بعد فترة بسيطة ينتهي " حماس " الزواج إن صح التعبير .. ! ؟
    أو خيار أخير تكون من برّا السعودية مثلاً .. أجنبية غربية ما تتكلم عربي ! .. هنا متعة الزواج تطول أكثر وأكثر (: .. وممكن طبعاً تكون كارثية لإنها حتكون على حساب أشياء أخرى كثيرة ..

    والنقطة الثانية ، اللي أختلف فيها مع كثير ..
    الفارق بين عمر الزوج والزوجة ..
    أنا أشوف إنه أفضل شيء إني اتزوج وحده قريبة من عمري يعني أصغر مني بسنة أو سنتين .. تكون فاهمة وواعية ،
    وهالشيء فعلاً مسبب لي ركبة لأسباب كثيرة (:

    أمّا ما بعد الزواج .. فهذه خليها عليّا !
    أقصد للضروف يعني !!
    /

    المزيد من النصائح يا أخ العرب .. لا توقف (:

    • نواف - 29/3/2011 @ 3:48 مساءً

      هههههههههههه
      هوا كل مرة ترجع وتعيد في نفس الهرجة
      شوف انا اعطيك الحل من الاخر
      مو انت تبغى تصير مليونير ؟
      خلاص بسيطة .. عدّد ياخي .. ايش المشكلة !؟
      خذ بنت خالتك ووحده اجنبية ووحده قريبة منك في العمر ! (باقي وحده؟)
      ولاتجلس تفكر وتصدع راسك !

  6. سلمان بت - 29/3/2011 @ 8:02 مساءً

    بسم الله والحمد لله والصلاة والسلام على رسول الله صلى الله عليه وسلم ..

    طبعا بحكم إني كنت “مرشد” للكثير من الشباب وهم في مرحلة الخطوبة وما قبل الزواج والحمد لله بنعمته وفضله وفقهم الله بحياة زوجية رائعة.. حبيت إني أحط خبرتي في ده الموضوع هنا .. ربما استفاد منها بعض الشباب اللي يمررو مرور الكرام .. وحابين يستفيدو ..

    أحلى حاجة في التدوينة عجبتني عن هذه المرحلة هي كلمة [البكش] .. فهذه فعلا مرحلة البكش .. يعني .. لا تتخيل إنك في هذه المرحلة حتبني شيء .. أو تفهم شخصية الطرف الآخر .. بتاتا .. فكلاكما يستكشف ويريد أن يتمتع بالرومانسية والحب الأولي .. فنصيحتي الذهبية لهذه المرحلة: تمتّعا كلاكما واكتشفا الرومنسية بجميع جوانبها وأطرافها .. كونا رومانسيين قدر الإمكان .. وتقلّد المخاطر في الرومانسية .. يعني مثلا: فين رايحين؟ – حديقة المسفلة (خخخخ) – طيب يللا أشوفك بعدين، عشان مشغول دحين – وتيجي تفاجئها في حديقة المسفلة باتصال – طبعا حتبعد عن كبار العائلة عشان ترد عليك وهي خجلانة – قول لها شوفي يمينك – وتحصلك واقف .. خخخخخخخ ..

    القصد: عيش الرومنسية وطبق أفلام الرومنسية بكل اشكالها .. من شدها ومدها .. والهدايا والجنان كله .. عيش حياتك ومتع نفسها ومتعها معاك في الرومنسية .. لا تفكر في الجنس بتاتا.. لأنه العمر كله باقي لك حتسوي جنس إلين تطفشو إنتو الإتنين (خخخخخخ .. طبعا إلا من رحم ربي – وهم قلائل الايام دي) ..

    هذه المرحلة ليست مرحلة الجد .. وليست مرحلة القراءة والتعرف على النفسيات والكلام الفاضي .. سيب كل شيء للزمن .. وعيش الفترة :)

    …… تجاربي في الفترات التي تلي هذه الفترة ستأتي مع تدويناتها إن شاء الله .. عيش حياتك مع التدوين يا نواف :)

    وبالنسبة للأخ حآلم:
    اختيار الزوجة وفارق العمر أعتقد إنهم نفس الموضوع .. يعني عمر الزوجة من مفردات الإختيار .. وخلينا نحط شوية منطق في الموضوع .. وشوية بيولوجي (أحياء البشر) .. وخلينا نفهم الموضوع من جزورو – زي ما يقولو ..

    عمر البلوغ لدى أنثى البشر من 9 إلى 12 سنة تقريبا، وعند الذكر من 12 إلى 15 سنة تقريبا (هذا في أغلب الأحيان، وللقاعدة شواذ) ..

    أنا شخصيا أعتقد – بفكري الناقص – إنه هذا الفارق في عمر البلوغ هو الفارق اللي المفروض يكون بينك وبين زوجتك واللي حيكون مناسب جدا حيث إنكم حتكونو في نفس مرحلة النضوج تقريبا .. يعني لو هي أصغر منك في حدود ثلاث سنوات تكونو مرررة مضبوطين عقليا وفكريا .. وكلاكما مر من نفس عدد السنوات من يوم هو بالغ وما قدر يثبت لنفسه إنه بالغ، هذا طبعا لو كلهم كانو مسلمين منضبطين زي ما كنا إحنا في زماننا (خخخخخخخخخخ) ..

    أما بالنسبة للقرابة فالهنود والباكستانية (الجنوب آسويين) لهم حكم في اختيار الزوجات عجيبة وغريبة .. وهي بحكم القواعد الذهبية لديهم .. فالأصل عندهم في الزوجة إنها ما تكون ذات قربى شديدة لدرجة إنه والدينك بالنسبة لها شيء عادي .. ولا تكون بعيدة مرة لدرجة إنها ما تعرف قدرهم ودرجتهم .. عاد إنت افهمها بطريقتك :)

    وعلى بركة الله يا حآلم .. اتزوج على بركة الله ..

    والله أعلم،،،

    • نواف - 29/3/2011 @ 10:18 مساءً

      ههههههههههههه
      والله انك خطير يا سلمان :)
      تعليقك تححححححححفة
      ولو انك شطحت شويتين لكن مرة عجبني
      انا معاك انو فترة الخطوبة تكون رومانسية وهيا اكيد راح تكون كذا لأنو ما في أي مسؤوليات بين الطرفين لذلك هي تكون فترة جميلة وتخلو في الغالب من المشاكل
      وانا مو قصدي انك تقلبها تحقيق واسئلة عشان تكتشف الطرف الاخر
      لا بس قصدي انك تحاول تعرف ايش يحب وايش يكره وبناءاً عليها تحاول تسوي اللي يحبه وتتجنب اللي يزعل منه وبالعكس هذا راح يجنبهم مشاكل كثير ممكن تحصل في الزواج
      هذا قصدي .. واشكرك بعنف على تعليقك الخطير :)

اترك تعليقاً